ALAVIS
November 30, 2017

Skyrfrómas með sítrónu- og ananasbragði

Ég gerði þessa uppskrift fyrir Gott í matinn um daginn en ÞENNAN LJÚFFENGA EFTIRRÉTT ER TILVALIÐ AÐ BJÓÐA UPP Á YFIR HÁTÍÐIRNAR. Ég hef oft gert hefðbundinn ananasfrómas eins og amma mín kenndi mér en núna langaði mig að prófa eitthvað nýtt og bætti við 2 dollum af sítrónusæluskyri. Mér fannst þess vegna tilvalið að kalla þessa tilraun skyrfrómas. Eftirrétturinn varð bragðmeiri fyrir vikið og ég er ekki frá því að ég noti þessa aðferð hér eftir:)
Uppskrift: 
1 heildós ananassafi eða 3 litlar dósir. 
500 ml. rjómi (þeyttur frekar minna en meira). 
2 dósir Ísey skyr – Sítrónusæla. 
10 blöð matarlím. 
250 gr. sykur. 5 egg.
Aðferð: 
Sigtið ananassafann frá ananassneiðunum og setjið til hliðar. Hitið því næst vatn í stórum potti og setjið annan minni ofan í. Hellið tæplega helmingnum af ananassafanum út í minni pottinn og bræðið matarlímsblöðin í safanum (eitt í einu) og hrærið í á meðan.
Látið kólna aðeins (ekki of mikið því þá harnar límið aftur). Hrærið egg og sykur þar til blandan er létt og ljós.
Þeytið 500ml af rjóma (frekar minna en meira) og hrærið því næst skyrinu saman við rjóman með sleif. Næst er þessu bætt út í eggjablönduna ásamt ananassafanum (ekki þessum með matarlíminu) og hrært rólega saman í hrærivélinni. Í lokin er ananassafanum með matarlíminu bætt út í. Passið að matarlímið fari ekki sjóðheitt út í, heldur vel volgt. Það má ekki vera farið að stífna. Hrærið aðeins meira og hellið í skálar.
Setjið inn í ísskáp í u.þ.b. 3-4 klst eða þar til skyrfrómasinn er farinn að stífna.
Ég vona að þetta smakkist vel:)